७६ व्या वर्षातही उत्साह कायम! मंत्री भुजबळांच्या हस्ते अंजिरवाडीत श्रींची प्रतिष्ठापना, विविध उपक्रम राबणार !
मंत्री छगन भुजबळांच्या हस्ते माझगावच्या अंजिरवाडीत श्री गणेशाची प्रतिष्ठापना
लाल दिवा-मुंबई, दि.७ सप्टेंबर :श्री गणेश चतुर्थीनिमित्त मुंबईतील माझगाव येथील अखिल अंजीरवाडी सार्वजनिक उत्सव मंडळ येथे मंडळाचे अध्यक्ष तथा राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांच्या हस्ते श्रीगणेशाची विधिपूर्वक प्रतिष्ठापना करण्यात आली.
यावेळी त्यांनी सहकुटुंब श्री गणेशाची आरती करत मनोभावे दर्शन घेतले. तसेच त्यांच्या हस्ते मंडळाच्या स्मरणिकेचे प्रकाशन करण्यात आले.
याप्रसंगी मंत्री भुजबळ म्हणाले, “अखिल अंजीरवाडी सार्वजनिक उत्सव मंडळाशी गेल्या अनेक वर्षांपासून आम्हा भुजबळ कुटुंबीयांचे जिव्हाळ्याचे नाते आहे. मुंबईतील सर्वात जुन्या गणेश मंडळांपैकी असलेल्या या मंडळाचे मी गेल्या अनेक वर्षांपासून अध्यक्ष आहे. यंदा मंडळाच्या गणेशोत्सवाचे ७६ वे वर्ष असून मंडळाच्या माध्यमातून दरवर्षी विविध सामाजिक उपक्रम राबविले जातात, तसेच आकर्षक देखावा देखील उभारला जातो.”
यावेळी माजी खासदार समीर भुजबळ, माजी आमदार पंकज भुजबळ यांच्यासह भुजबळ कुटुंबातील सर्व सदस्य, मंडळाचे पदाधिकारी, कार्यकर्ते आणि अंजिरवाडी, माझगाव परिसरातील भाविक मोठ्या संख्येने उपस्थित होते.
