कारागृहाच्या नाकावर सुरक्षेला आव्हान! चंदनाच्या झाडाची चोरी करण्याचा धाडसी प्रयत्न!
अरेच्चा! जेलच्या बाहेर झाडही सुरक्षित नाही!
लाल दिवा-नाशिक,दि.२९:-नाशिकरोड (प्रतिनिधी) – नाशिकरोड मध्यवर्ती कारागृहाबाहेर एका चंदनाच्या झाडाची चोरी करण्याचा धाडसी प्रयत्न अज्ञातांनी केल्याची घटना समोर आली आहे. ही घटना २५ सप्टेंबर रोजी पहाटेच्या सुमारास घडली.
मिळालेल्या माहितीनुसार, नाशिकरोड कारागृहाच्या मुख्य प्रवेशद्वाराजवळील मोकळ्या जागेत हे चंदनाचे झाड आहे. पहाटे सुमारे २ वाजून १० मिनिटांच्या सुमारास अज्ञात इसमाने या झाडाला कापून तोडण्याचा प्रयत्न केला. मात्र, काही कारणास्तव तो झाड पूर्णपणे तोडू शकला नाही.
या घटनेची माहिती मिळताच नाशिकरोड पोलीस ठाण्याचे वरिष्ठ पोलीस निरीक्षक संतोष गिरी यांच्या नेतृत्वाखाली पथक घटनास्थळी दाखल झाले. पोलिसांनी पोलीस निरीक्षक नाईकवाडे यांच्या मार्गदर्शनाखाली घटनास्थळाचा पंचनामा करून पुढील तपास सुरू केला आहे. या प्रकरणी अज्ञात इसमाविरुद्ध भादंवि कलम ३०३ (२), ६२ अन्वये गुन्हा दाखल करण्यात आला आहे. पोलीस हवालदार गोसावी हे तपास करीत आहेत.
या घटनेमुळे परिसरात एकच खळबळ उडाली आहे. कारागृहासारख्या अतिसंवेदनशील परिसरात अशा प्रकारे चोरीचा प्रयत्न होणे ही गंभीर बाब असल्याचे नागरिकांनी म्हटले आहे. पोलिसांनी या प्रकरणातील आरोपींना लवकरात लवकर अटक करावी, अशी मागणीही नागरिकांनी केली आहे.
