इंदिरानगर मध्ये महिलेचा मृतदेह आढळला, हत्या झाल्याचा संशय….!

लाल दिवा-इंदिरानगर: इंदिरानगर परिसरातील सदाशिव नगरमधील कृष्णा प्राईड सोसायटीत एका ३५ वर्षीय महिलेचा मृतदेह आढळून आल्याने खळबळ उडाली आहे. निशा मयूर नागरे असे मयत महिलेचे नाव आहे.

पोलिसांनी दिलेल्या माहितीनुसार, निशा या आपल्या पतीसोबत राहत होत्या. आज दुपारी त्यांची घरकाम करणारी महिला कामावर आली असता तिला निशा यांचा मृतदेह घरात संशयास्पद अवस्थेत आढळला. तिने तात्काळ पोलिसांना कळवले.

घटनास्थळी धाव घेतलेल्या पोलिसांना हत्येचा संशय आहे. घरातील वस्तू विस्कळीत असून, हत्ये नंतर घराबाहेरील कडी लावून आरोपी पसार झाल्याचे दिसून येते. पोलिसांनी घटनास्थळाचा पंचनामा करून मृतदेह शवविच्छेदनासाठी जिल्हा रुग्णालयात पाठवला आहे. हत्येचे कारण अद्याप स्पष्ट झाले नसून, पोलिसांनी तपास सुरू केला आहे.