चोरीच्या महाजालाला पोलिसांचा निर्णायक फटका! विधीसंघर्षित बालकासह चोरट्याला अटक

गुन्हेशाखा युनिट १ ची कारवाई, मोटारसायकल चोरीच्या टोळीचा पर्दाफाश

लाल दिवा-नाशिक, दिनांक:(५) – नाशिक शहर पोलीस दलाने चोरीच्या मोटारसायकलींच्या जाळ्याचा पर्दाफाश केला आहे. गुन्हेशाखा युनिट क्रमांक १ च्या अथक परिश्रमाने विधीसंघर्षित बालकासह एका चोरट्याला बेड्या ठोकल्या आहेत. या कारवाईत पाच मोटारसायकली हस्तगत करण्यात आल्या असून त्यांची एकूण किंमत २,६०,०००/- रुपये आहे. 

नाशिक शहर पोलीस आयुक्त श्री. संदिप कर्णिक यांनी चोरीच्या वाढत्या घटनांना आळा घालण्याचे कडक आदेश दिले होते. त्यानुसार पोलीस उपायुक्त (गुन्हे) श्री. प्रशांत बच्छाव आणि सहाय्यक पोलीस आयुक्त (गुन्हेशाखा) श्री. संदिप मिटके यांच्या मार्गदर्शनाखाली गुन्हेशाखा युनिट १ ने तपास सुरू केला. 

गुप्त बातमीदाराकडून मिळालेल्या माहितीनुसार, मेळा बसस्थानकाच्या दुचाकी पार्किंगमध्ये चोरीच्या मोटारसायकली विक्रीसाठी दोन संशयित येणार होते. वरिष्ठ पोलीस निरीक्षक श्री. मधुकर कड यांच्या आदेशानुसार पोउपनि. रविंद्र बागुल, पोहवा प्रशांत मरकड, विशाल काठे, प्रदीप म्हसदे, प्रवीण वाघमारे, योगीराज गायकवाड आणि नाजीम पठाण यांच्या पथकाने सापळा रचला. 

या सापळ्यात अथर्व उर्फ लाड्या संपत घोलप (१८, रा. जिजामाता कॉलनी, सातपूर, नाशिक) आणि एक विधीसंघर्षित बालक सापडले. त्यांच्याकडून एक केटीएम आणि एक एचएफ डिलक्स मोटारसायकल जप्त करण्यात आल्या. चौकशीदरम्यान घोलपने उर्वरित तीन मोटारसायकली सातपूर आणि गंगापूर परिसरातून चोरल्याची कबुली दिली. त्याच्या घरावरून आणखी दोन मोटारसायकली – एक होन्डा अॅक्टिवा आणि एक बजाज डिस्कव्हर – जप्त करण्यात आल्या.

या कारवाईमुळे म्हसरूळ, गंगापूर आणि सातपूर पोलीस ठाण्यांमध्ये दाखल असलेले पाच मोटारसायकल चोरीचे गुन्हे उघडकीस आले. आरोपी घोलपला पुढील कारवाईसाठी गंगापूर पोलीस ठाण्याकडे सोपविण्यात आले आहे. विधीसंघर्षित बालकावरही योग्य ती कारवाई करण्यात येत आहे.

पोलीस आयुक्त कर्णिक यांनी या कामगिरीबद्दल गुन्हेशाखा युनिट १ च्या संपूर्ण पथकाचे कौतुक केले. सपोनि. हेमंत तोडकर, पोउपनि. रविंद्र बागुल, तसेच देविदास ठाकरे, रमेश कोळी, कैलास चव्हाण, पोना. विशाल देवरे, पोअं. रामबर्डे आणि मपोअं. अनुजा येलवे यांच्यासह सर्व पोलिस अधिकारी आणि कर्मचाऱ्यांचे त्यांनी विशेष कौतुक केले. या कारवाईमुळे नाशिककरांमध्ये सुरक्षिततेची भावना निर्माण झाली आहे.