अंबडमध्ये गांजा विक्रेत्यांवर पोलिसांची धाडसी कारवाई, दोघे जण जेरबंद, २५ हजारांचा गांजा जप्त !
- अंबडमध्ये गांजा तस्करांचा पर्दाफाश: दोन जणांना बेड्या, १ लाखांहून अधिकचा मुद्देमाल जप्त
लाल दिवा-नाशिक,२२:-अंबड: (प्रतिनिधी) – अंबड पोलिसांनी गुप्त माहितीच्या आधारे गांजा विक्री करणाऱ्या टोळीवर कारवाई करत दोन जणांना अटक केली आहे. त्यांच्याकडून २५ हजार रुपये किमतीचा २ किलो ५३३ ग्रॅम वजन असलेला गांजा जप्त केला आहे. तसेच रिक्षासह एकूण १ लाख ४१ हजार ६५ रुपयांचा मुद्देमाल जप्त करण्यात आला आहे. पोलिसांच्या या कामगिरीबद्दल परिसरातून कौतुकाचा वर्षाव होत आहे.
ही कारवाई दिनांक २१ सप्टेंबर रोजी दुपारी ३:२५ वाजता अंबड गाव तलाठी कार्यालयाजवळील शंकर नगर बोर्डाजवळ करण्यात आली. अटक करण्यात आलेल्या आरोपीत संदीप उर्फ बाळा राजाराम महाले (वय २४, रा. अंबडगाव, बस स्टॉप, भाजी मार्केटजवळ) आणि सुकदेव गंगाधर जाधव (वय ३३, रा. जाधव संकुल, रो हाउस नं १५०, अंबड लिंक रोड) यांचा समावेश आहे.
पोलिसांनी दिलेल्या माहितीनुसार, अंबड परिसरात काही जण गांजा विक्री करत असल्याची माहिती पोलिसांना मिळाली होती. त्यानुसार पोलिसांनी सापळा रचला. संदीप महाले आणि सुकदेव जाधव हे दोघे एम.एच १५ जे.ए १६८६ क्रमांकाच्या रिक्षामधून गांजा घेऊन विक्रीसाठी जात असल्याचे निदर्शनास आले. पोलिसांनी त्यांना थांबवून झडती घेतली असता रिक्षामध्ये पिवळ्या रंगाच्या पिशवीत गांजा आढळून आला.
पोलिसांनी आरोपींकडून गांजा, रिक्षा, दोन मोबाईल फोन, रोकड रक्कम असा एकूण १ लाख ४१ हजार ६५ रुपयांचा मुद्देमाल जप्त केला आहे. अंबड पोलिसांनी वेळीच कारवाई करून मोठ्या प्रमाणात गांजा विक्रीला आळा घातल्याने नागरिकांनी समाधान व्यक्त केले आहे.
“ही कारवाई फार महत्वाची आहे. पोलिसांनी चांगले काम केले आहे. यामुळे परिसरातील तरुणाईला धोका निर्माण होण्यापासून वाचवण्यास मदत होईल -स्थानिक रहिवासी, अंबड
आम्ही अशा कारवाया करत राहू. नागरिकांनीही पोलिसांना सहकार्य करावे आणि अशा घटनांची माहिती द्यावी.” – पोलीस निरीक्षक, अंबड पोलीस ठाणे
या प्रकरणी अंबड पोलीस ठाण्यात एनडीपीस अॅक्ट कलम ८ क, २० ब, २९ अंतर्गत गुन्हा दाखल करण्यात आला असून पुढील तपास सपोनि रौंदळे करत आहेत.
