जेलरोड भागात भीषण अपघात, वृद्धाला दुचाकीची धडक, मृत्यू; चालकाचा शोध सुरू
नाशिकरोड: रस्ता ओलांडताना वृद्धाला भरधाव दुचाकीची धडक, मृत्यू
लाल दिवा-नाशिक,दि.१७:-नाशिकरोड (प्रतिनिधी): नाशिकरोड येथील जेलरोड भागात एका अज्ञात दुचाकीस्वाराने वृद्धाला जोरदार धडक दिल्याने त्यांचा जागीच मृत्यू झाल्याची धक्कादायक घटना घडली. ही घटना मंगळवारी, २५ सप्टेंबर २०२४ रोजी सकाळी ९:१० वाजण्याच्या सुमारास मॉडेल कॉलनीतील देशमुख भवन समोर घडली.
पोलिसांनी दिलेल्या माहितीनुसार, मयत काशिनाथ नरसिंगराव रावबच्छे (वय ८२, रा. कलाकार, प्रगती हेरीटेज, शिवशक्ती नगर, स्वामी समर्थ केंद्राचे समोर, जेलरोड) हे देशमुख भवन समोरून रस्ता ओलांडत होते. त्याचवेळी, जेलरोड पाण्याच्या टाकीकडून भरधाव वेगाने येणाऱ्या एका अज्ञात दुचाकीस्वाराने त्यांना जोरदार धडक दिली. ही धडक इतकी भीषण होती की, श्री. रावबच्छे यांचा जागीच मृत्यू झाला. अपघात घडवून दुचाकीस्वार घटनास्थळावरून पसार झाला.
घटनेची माहिती मिळताच नाशिकरोड पोलिस तात्काळ घटनास्थळी दाखल झाले. मृतदेह ताब्यात घेऊन शवविच्छेदनासाठी रुग्णालयात पाठविण्यात आला. याप्रकरणी मयत काशिनाथ रावबच्छे यांचे पुत्र किरण रावबच्छे (वय ५०) यांच्या फिर्यादीवरून नाशिकरोड पोलिस ठाण्यात अज्ञात दुचाकीस्वाराविरुद्ध गुन्हा दाखल करण्यात आला आहे.
पोलीस उपनिरीक्षक आहिरे यांच्या नेतृत्वाखाली पोलिसांचे पथक आरोपीचा शोध घेत आहे. घटनास्थळाजवळील सीसीटीव्ही फुटेज तपासून आरोपीची ओळख पटविण्याचे काम सुरू आहे
