चोरांच्या मुसक्या आवळल्या! नाशिकरोड पोलिसांची धडाकेबाज कामगिरी, २० लाखांचे मोबाईल परत मिळवले!
CEIR तंत्रज्ञानाचा कमाल! चोरीचे मोबाईल परत
लाल दिवा-नाशिक,दि.२९ :- नाशिकरोड पोलिसांनी पुन्हा एकदा आपली कार्यक्षमता सिद्ध केली आहे. चोरीला गेलेले तब्बल २० लाख रुपये किमतीचे १३० मोबाईल फोन शोधून त्यांच्या मालकांपर्यंत पोहोचवण्यात पोलिसांना यश आले आहे. ही कामगिरी दहशतवाद विरोधी पथकाने (ATC) केली असून, त्यांच्या या धडाकेबाज कारवाईचे सर्वत्र कौतुक होत आहे.
केंद्र सरकारच्या CEIR पोर्टलच्या सहाय्याने पोलिसांनी हे यश मिळवले आहे. मा. पोलीस आयुक्त संदीप कर्णिक, मा. पोलीस उपायुक्त मोनिका राऊत आणि मा. सहाय्यक पोलीस आयुक्त सचिन बारी यांच्या मार्गदर्शनाखाली नाशिकरोड पोलीस ठाण्याचे वरिष्ठ पोलीस निरीक्षक अशोक गिरी यांनी ही मोहीम राबवली. पोलीस निरीक्षक (गुन्हे) बडेसाहब नाईकवाडे, पोनि अरुण सावंत, पोनि विश्वजित जगताप, गुन्हे शोध पथकाचे सहाय्यक पोलीस निरीक्षक प्रविण सुर्यवंशी आणि गुन्हे शोध पथकाचे पोउपनि संदीप पवार यांनी देखील या मोहिमेत महत्त्वपूर्ण योगदान दिले.
१ ऑगस्ट २०२४ पासून सुरू झालेल्या या मोहिमेअंतर्गत २०२१ पासून आजपर्यंत चोरीला गेलेल्या मोबाईल फोनच्या तक्रारींची माहिती CEIR पोर्टलवर अपलोड करण्यात आली. दहशतवाद विरोधी पथकातील पोहवा संदीप पवार (१८५१), पोहवा विष्णु गोसावी (८३०), पोना हेमंत मेढे (४२९) आणि पोअं राहुल मेहेंदळे (२४८९) यांनी अथक परिश्रम घेऊन ही माहिती पोर्टलवर अपलोड केली आणि त्याचे तांत्रिक विश्लेषण करून पोलिसांनी तब्बल १३० मोबाईल फोन शोधून काढले. या मोबाईलची अंदाजे किंमत १९ लाख ४५ हजार रुपये आहे. २८ नोव्हेंबर २०२४ रोजी जप्त करण्यात आलेले हे सर्व मोबाईल २९ नोव्हेंबर रोजी त्यांच्या मालकांना परत करण्यात आले.
या कामगिरीबद्दल पोलीस दलातील सर्व अधिकारी आणि कर्मचाऱ्यांचे कौतुक होत आहे. नागरिकांच्या दृष्टीने ही मोठी दिलासादायक बाब असून, पोलिसांच्या या प्रयत्नांमुळे चोरांना चाप बसेल, असा विश्वास व्यक्त केला जात आहे. पोलिसांच्या या धडाकेबाज कारवाईमुळे नाशिककरांमध्ये सुरक्षिततेची भावना निर्माण झाली आहे.
पोलिसांचे कौशल्य आणि तंत्रज्ञानाचा वापर यांच्या सुंदर संगमाचे हे उत्तम उदाहरण म्हणावे लागेल!
