बदलीचा भाव १५ हजार! दुय्यम अभियंता ACBच्या जाळ्यात
लाचखोरीचा पर्दाफाश! दुय्यम अभियंत्याला ACBच्या जाळ्यात
लाल दिवा-नाशिक, ७ नोव्हेंबर २०२४: बदलीसाठी तब्बल १५ हजार रुपयांची लाच मागणाऱ्या बृहन्मुंबई महानगरपालिकेच्या दुय्यम अभियंत्याला लाचलुचपत प्रतिबंधक विभागाने (ACB) रंगेहाथ पकडले आहे. मध्य वैतरणा धरण प्रकल्प, कोचाळे येथे कार्यरत असलेले प्रवीण किसन बांबळे (४६) हे आरोपी आहेत. एका कर्मचाऱ्याची मुंबईतून कोचाळे येथे बदली करण्यासाठी त्यांनी ही लाच मागितली होती.
बांबळे यांनी बदलीच्या मोबदल्यात १५,००० रुपये मागितले होते. त्यापैकी ५,००० रुपये आधीच घेतले होते. उर्वरित १०,००० रुपये घेताना ACBने त्यांना सापळा रचून जेरबंद केले. तक्रारदाराने ACBकडे धाव घेतल्यानंतर ही कारवाई करण्यात आली.
पोलीस उपअधीक्षक अनिल बडगुजर यांच्या नेतृत्वाखालील पथकाने ही कारवाई केली. पोलीस हवालदार दीपक पवार, पोलीस शिपाई संजय ठाकरे आणि चालक पोलीस हवालदार विनोद पवार हे पथकात सहभागी होते. पोलीस अधीक्षक शर्मिष्ठा घारगे-वालावलकर यांनी या कारवाईचे मार्गदर्शन केले.
बांबळे यांच्यावर भ्रष्टाचार प्रतिबंधक कायद्यांतर्गत गुन्हा दाखल करण्यात आला आहे. ACBने नागरिकांना आवाहन केले आहे की, कोणत्याही शासकीय अधिकारी/कर्मचारी लाच मागितल्यास त्यांनी तात्काळ ACBशी संपर्क साधावा (०२५३-२५७८२३०, टोल फ्री: १०६४).
कोण आहे तक्रारदार? बृहन्मुंबई महानगरपालिकेत कामगार म्हणून कार्यरत. परीक्षेद्वारे कार्यकारी सहायक पदावर नियुक्ती. मुंबईत बदली झाल्यानंतर वैद्यकीय कारणास्तव कोचाळे येथे परत बदलीची विनंती.
काय आहे आरोप? बदली प्रक्रियेत मदत केल्याबद्दल १५,००० रुपयांची लाच मागितल्याचा आरोप..
