अल्पवयीन मुलांकडून चोरीच्या ११ मोटरसायकली जप्त: म्हसरूळ पोलीसांची कामगिरी
११ बाइक्स… ५ साथीदार… आणि पोलीसांशी एक धमाकेदार खेळ!
लाल दिवा-नाशिक, दि. ०५/१०/२०२४ – म्हसरूळ पोलीसांनी अल्पवयीन मुलांकडून चोरीच्या ११ मोटरसायकली जप्त केल्याची धक्कादायक घटना समोर आली आहे. म्हसरूळ, पंचवटी, उपनगर आणि भद्रकाली पोलीस ठाण्यांच्या हद्दीतून या मोटरसायकली चोरी झाल्या होत्या.
दिनांक ०४/१०/२०२४ रोजी म्हसरूळ पोलीस ठाण्याचे पोउपनि/दिपक पटारे आणि त्यांच्या पथकाने पेठरोड भागात गस्त घालत असताना त्यांना मोटारसायकल चोरीची माहिती मिळाली. त्यानुसार कारवाई करीत असताना त्यांना दोन अल्पवयीन मुले एका मोटरसायकलवरून जाताना दिसली. त्यांना थांबविण्याचा प्रयत्न केला गेला पण ते पळून जाऊ लागले. अखेर त्यांना एस.टी. वर्कशॉप येथे पकडण्यात आले.
या मुलांकडे विचारपूस केली असता त्यांनी मोटारसायकलची कागदपत्रे दाखवली नाहीत. तपासणी केली असता ही मोटारसायकल म्हसरूळ पोलीस ठाण्याच्या हद्दीतून चोरी झाल्याचे निष्पन्न झाले.
पुढील चौकशीत या मुलांनी कबूल केले की त्यांनी आणि त्यांच्या चार-पाच मित्रांनी मिळून मनोरंजनासाठी मोटारसायकली चोरी केल्या होत्या. ते म्हसरूळ, पंचवटी, उपनगर आणि भद्रकाली पोलीस ठाण्यांच्या हद्दीतून मोटारसायकली चोरी करून त्यांच्या नंबरप्लेट काढून टाकत असत आणि दिवसभर फिरून रात्री त्या कुठेतरी लपवून ठेवत असत.
पोलिसांनी या मुलांना ताब्यात घेतले असून त्यांच्याकडून ११ मोटरसायकली जप्त केल्या आहेत. त्यापैकी ४ म्हसरूळ, २ पंचवटी, २ उपनगर आणि १ भद्रकाली पोलीस ठाण्याच्या हद्दीतून चोरी झाल्या होत्या. पुढील तपास पोहवा/१८८० सतिष वसावे करीत आहेत.
या कामगिरीबद्दल पोलीस आयुक्त संदीप कर्णिक, पोलीस उपायुक्त किरणकुमार चव्हाण, सहा. पोलीस आयुक्त श्रीमती पदमजा बढे यांनी म्हसरूळ पोलिसांचे कौतुक केले आहे.
